Lestrarmenning
Leikskólinn tókþátt í  verkefni á vegum Reykjanesbæjar sem bar yfirskriftina Lestrarmenning í Reykjanesbæ og hófst formlega 8. apríl 2003 Verkefnið er þriggja ára samfélagslegt þróunarverkefni  sem nær til leik- og grunnskóla, bókasafns, fjölskyldu og félagsþjónustu, menningar- og tómstundastarfs, verkalýðsfélaga, fyrirtækja og samtaka hér í bæ.  Verkefninu lauk formlega í apríl 2006.  Á degi íslenskrar tungu árið 2005 veitti Þorgerður Katrín Gunnarsdóttir menntamálaráðherra Eiríki Hermannssyni fræðslustjóra viðurkenningu ráðuneytisins fyrir verkefnið “Lestrarmenning í Reykjanesbæ.”

Leikskólinn tekur þátt í þessu verkefni og hefur sett sér eftirfarandi markmið
 
· Að skapa lestrarmenningu sem er komin til að vera.
· Að   stuðla að auknum áhuga barna á sögum, ljóðum og þulum.
· Að auka málskilning og máltjáningu barnanna.
· Að starfsfólk verði meðvitað  um að málörvun fer fram í öllu daglegu starfi leikskólans.
· Að starfsfólk verði meðvitað um  mikilvægi lesturs fyrir málþroska barna.

Að lesa daglega fyrir börn eykur almennan orðaforða, hugtakaskilning, einbeitingu, athygli og almennan lesskilning sem er undirstaða frekara náms.

Þó að verkefninu sé formlega lokið er það hluti af starfinum okkar í Hjallatúni. Ingibjörg Jónsdóttir aðstoðarleikskólastjóri og Unnur Þorláksdóttir leikskólakennari hlada utan um verkefni.  Þær kynna á mánaðarlegum starfsmannafundum höfund mánaðrins og koma með innlegg og fræðslu um málrækt og málörvun. Einnig hafa þær kynnt spil sem skólinn á.

Í vetur verður áfram unnið með sögur, ljóð og þulur.  Ljóð/þula mánaðarins er kynnt á starfsmannafundum sem og höfundur mánaðarins og barnabækur eftir hann. Hengd eru upp veggspjöld um höfund mánaðarins  í báðum göngum.   Sú hefð hefur skapast í kringum þetta verkefni að starfsmaður kynnir sínar uppáhaldsbarnabækur  og hefur það leitt til .þess að margar ófáanlegar barnabækur í eigu starfsfólks hefur rekið á fjörur okkar.   
Hlutverk starfsmanna er að fylgja eftir áætlun um lestrarmenningu  og sníða hana að aldri og þroska þeirra barna sem þeir eru með í hóp og á heimastofum.

Málörvun   er  eitt af markmiðunum í hópasamveru hjá  öllum árgöngum.  Með tveimur yngsta árgöngunum  er lögð áhersla á stuttar sögur, leiki og ljóð.   Unnið er samkvæmt könnunaraðferðinni  með tvo elstu árgangana en í þeirri aðferð er m.a. lögð áhersla á að  tengja talmál og ritmál. Elstu börnin eru í svokölluðum elstu barna verkefnum.  Unnið er með námsefnið  Ótrúleg eru ævintýrin sem eru vísur og sögur til málörvunar  og  bókina  Markviss málörvun-þjálfun hljóðkerfisvitundar ásamt fleiri bókum og verkefnum.

Gullkorn um lestur
Barn sem lesið er fyrir á hverju kvöldi frá því að það er nógu gamalt til að skoða myndir og  þar til skólaaldri er náð. Þá jafnast það á við að minnsta kosti þúsund kennslustundir í móðurmáli. Barn sem fer á mis við þessa reynslu þarf því á fá þúsund aukatíma til að standa jafnfætis  bókavönum bekkjarsystkinum sínum. (Ragnheiður Briem íslenskufræðingur,  grein úr Morgunblaðinu  sem heitir  Meira en miljón gefins og fjallar um móðurmálskennslu).