Á Hjallatúni er starfað útfrá kenningu um hæfileika manna svokallaðri Fjölgreindarkenningu. Sálfræðingur að nafni Howard Gardner setti fram kenningu um fjölgreindir árið 1983. Kjarninn í kenningu hans er að hægt sé að meta mannlega möguleika og hæfileika útfrá breiðara viðmiði en  áður hafði verið gert.   Hann flokkaði því greind manna í 8 flokka:

Málgreind – Rökgreind – Rýmisgreind – Hreyfigreind -Tónlistargreind – Sjálfþekkingar/-Tilfinningagreind - Samskiptagreind  - Umhverfisgreind.

Á hverju vori metum við sterkar hliðar barnanna með hliðsjón af Fjölgreindarkenningunni útfrá eftirfarandi viðmiðum.

Málgreind
Næmi fyrir hljóðum, gerð, merkingu og hlutverkum orða og tungumáls.
Börn sem hafa góða málgreind hugsa í orðum og finnst til dæmis gaman að hlusta á sögur, segja sögur og nota orðaleiki.

Rök og stærðfræðigreind
Hæfileiki til að átta sig á röklegum og tölulegum mynstrum, hæfileiki til að fást við langar rökleiðslur.
Börn sem hafa góða rök og stærðfræðigreind hugsa með rökleiðslu og finnst til dæmis gaman að gera tilraunir, spyrja, leysa rökgátur, byggja úr einingakubbum og holkubbum.

Rýmisgreind
Hæfni til að skynja hinn sýnilega rýmisheim nákvæmlega og til að ummynda fyrstu skynjun.
Börn sem hafa góða rýmisgreind hugsa í ímyndum og myndum og finnst til dæmis gaman að hanna, teikna, sjá fyrir sér og krota.

Líkams- og hreyfigreind
Hæfni til að hafa stjórn á eigin líkama og til að handleika hluti og beita verkfærum. Felur einnig í sér næmt tímaskyn.
Börn sem hafa góða líkams- og hreyfigreind hugsa með líkamsskynjun og finnst til dæmis gaman að dansa, hlaupa, stökkva og byggja.

Tónlistargreind
Hæfileiki til að framleiða og meta að verðleikum takt, tónhæð, tónblæ; að meta form tónskynjunar.  Tónlistargreind kemur fyrst í ljós af öllum greindarþáttunum.
Börn sem hafa góða tónlistargreind hugsa í takti og lögum og finnst  til dæmis gaman að syngja, blístra, raula, slá takt með höndum og fótum og  hlusta.

Umhverfisgreind
Leikni í að greina tegundir; þekkja skyldar tegundir. Næmi fyrir fyrirbrigðum náttúrunnar og umhverfis.  Hæfileiki til að rata.
Börn sem hafa góða umhverfisgreind hugsa með hjálp náttúrunnar og tilbrigða hennar og finnst til dæmis gaman að leika við gæludýr, vinna í garðinum, rannsaka náttúruna, rækta dýr og  sýna umhyggju fyrir jörðinni.

Samskiptagreind
Hæfni til að átta sig á og bregðast rétt við hugarástandi, skapgerð, áhuga og óskum annarra.  Hæfni til samstarfs og næmi á yrt og óyrt tjáskipti.  Hæfileiki til að hugleiða mörg sjónarmið.
Börn sem hafa góða samskiptagreind hugsa með því að varpa fram hugmyndum sínum við aðra og finnst til dæmis gaman að hafa forustu, skipuleggja, tengjast, ráðskast með, miðla málum, og taka þátt í samkvæmum.

Sjálfsþekkingar
Aðgangur að eigin tilfinningalífi og hæfni til að greina á milli tilfinninga sinna, þekking á eigin veikleikum og styrkleikum. Næmi til að öðlast sjálfsvitund og getu til að þróa og tjá tilfinningar. 
Börn sem hafa góða sjálfsþekkingar/- tilfinningagreind hugsa með hliðsjón af eigin þörfum, tilfinningum og markmiðum og finnst til dæmis gaman að setja markmið, miðla málum, dreyma, áætla og íhuga.

Þessi kenning fær okkur til að setja hvert einstakt barn i brennidepil og líta á þau sem hæfa einstaklinga. Allir eru sterkir á einhverju sviði og börnin læra best í gegnum sýna sterkustu greind.